Ukraina nderoi viktimat dhe ushtarët ndërsa lufta me Rusinë hyri në vitin e dytë! Në përvjetorin e sulmit rus, në Ukrainë mbërritën 4 tanket e para perëndimore. Presidenti turk Erdogan bisedoi me Putinin dhe Zelenskin për ndalimin e luftës për ti dhënë fund viktimave ndërsa SHBA kanë refuzuar një plan paqeje të propozuar nga Kina.
Në 1 vjetorin e fillimit të luftës në Ukrainë Presidenti Turk Recep Tayyip Erdoğan ka telefonuar liderët e dy vendeve në një përpjekje për nisjen e bisedimeve të paqes. Sipas mediave, ai i kërkoi Putin-it i ringjalljen e marrëveshjes së arritur në Stamboll, ndërsa Zelensky-t i shprehu gatishmërinë për një zgjidhjeje të bazuar në negociata për vendosjen e paqes.
Një propozim për paqen e artikuloi edhe Kina, por paketa e Pekinit nuk u përfill nga SHBA. Megjithatë, presidenti Zelensky i ka bërë edhe njëherë thirrje Kinës dhe Indisë për tu përfshirë në procesin e paqes.
Më herët Ukraina nderoi viktimat dhe ushtarët e rënë në luftë për mbrojtjen e vendit. Presidenti ukrainas u shfaq i përlotur teksa u mbajt himni kombëtar në ceremoninë në sheshin Shën Sofia të Kievit. U zotua se 2023 do të jetë viti i fitores.
Pas 1 minute heshtjeje në nderim të “heronjve” të luftës, shpërndau dekorata për familjet e ushtarëve të vrarë. Ditën e sulmit rus e cilësoi me të vështirën dhe më të gjatën.
Në kohën kur paqja ne tavolinë duket e largët, në Ukrainë mbërritën 4 tanket e para “leopard” ndërsa 10 të tjerë do të dërgohen së shpejti nga Polonia. Kievi pret dhe shumë tanke tjerë të premtuara nga SHBA e vende të tjera Evropiane që 1 vjetorin e sulmeve në Ukrainë i përkujtuan me nderim të viktimave dhe sanksione ndaj Rusisë. Ndërtesa ikonike në të gjithë botën u ndriçuan me ngjyrat e flamurit ukrainas si shenjë solidariteti!