Ulja e temperaturave të motit dhe përdorimi masiv i energjisë elektrike për ngrohje, ka rritur numrin e zjarreve problematikë në kabinat e shpërndarjes së energjisë elektrike në Gjirokastër.
Specialistët zjarrfikës shprehen me shqetësim se përgjatë muajit nëntor janë regjistruar disa zjarre në kabinat e shpërndarjes së energjisë të vendosura në katet e para ta pallateve duke rrezikuar jetën e banorëve.
“Ka pasur shumë situata edhe në pjesën e ashensorëve, edhe në pjesën e kabinave. Kryesisht janë vendosur në katet e para dhe tymi krijon panik në përgjithësi por janë përballuar me sukses nga shërbimi zjarrfikës, kemi pasur bashkëpunim me operatorët e shpërndarjes së energjisë elektrike por edhe me pjesën tjetër të strukturave të emergjencave civile”, thotë Fatjon Kazma, specialist zjarrfikës.
Shkak i zjarreve të tilla krahas mbingarkesës në rrjet janë edhe linjat e vjetra dhe të amortizuara të shpërndarjes së energjisë elektrike.
Shqetësim për zjarrfikësit e Gjirokastrës në këto ditë me temperatura të ulëta ngelen edhe zjarret si shkak i keqpërdorimit të bombulave me gaz të lëngshëm.
“Kemi pasur edhe shumë raste zjarri në bombula gazi, bombulat që përdoren për ngrohje dhe për gatim janë të amortizuara, janë të pacertifikuara, të pakolauduara. Qytetarëve iu bëj apel që t’i çojnë pranë pikave të gazit, të cilat janë të autorizuara dhe të licencuara për t’i certifikuar, sepse bombula e ka deri në 10 vjet certifikimin, duhet patjetër të certifikohet dhe të kontrollohet”, apelon ai.
Zjarrfikësit apelojnë që qytetarët të tregojnë kujdes në përdorimin e pajisjeve me energji elektrike dhe gaz të lëngshëm duke parandaluar zjarret me pasoja të rënda.