Vajza pukjane shkëlqen në Kinë, merr çmimin e parë në Samitin Botëror të Inovacionit

26 vjeçarja shqiptare Serena Leka ka shkëlqyer në Samitin Botëror të Inovacionit në Kinë, ku ka marrë çmimin e parë në një event të organizuar në fushën e sipërmarrjes dhe startup-eve. Vajza nga Fushë-Arrëzi arriti shpejt të rrëmbejë vëmendjen e të gjithëve në Samitin Botëror të Inovacionit në Kinë, teksa emri i saj dhe i kompanisë “Cellugy” që ajo përfaqëson zuri vendin e parë.

26 vjeçarja ka udhëtuar në më shumë se 15 vende të botës, ndërsa ka qenë dhe drejtoreshë ekzekutive e rrjetit të studentëve ekselentë në Tiranë, është e vetmja studente shqiptare që ka fituar një bursë prej 50.000 euro nga Mbretëria daneze, si dhe ka qenë pjesë e grupit bërthamë të studentëve ekselentë nga mbarë bota.

Serena ka kryer studimet master në Danimarkë në Universitetin e Aarhusit, aty ku më pas dhe do të punësohej. Temën e diplomës do ta përgatiste në bashkëpunim me një nga firmat më të fuqishme për industrinë inxhinierike, me më shumë se 25.000 punonjës në mbi 100 shtete në bote, “Danfoss A/S”.