Familjarët e Jani Rustemajt, të riut që ndërroi jetë pasi qëndroi 1 muaj në koma, kanë protestuar para Ministrisë së Drejtësisë.
27-vjeçari ishte i arrestuar për vjedhjen e një tapeti dhe një palë atleteje kur u arrestua dhe përfundoi në spital.
Familjarët shprehen se kur ishin në spital, nuk e lejonin që të shihnin djalin, ndërsa pretendojnë se kanë vënë re shenja dhune në trupin e tij.
“Kontrollova djalin dhe ka pasur dhëmbin e thyer dhe pjesën e veshit të nxirë. Në Spital nuk na lejonin ta shikojmë. Nuk e dimë se s’na lejonin ta shohim. Do të vazhdojmë protestat dhe do të kërkojmë të drejtën kudo. Policia nuk ka të drejtë të prekë një njeri me dorë. Çfarëdolloj krimi të kenë bërë. Askush s’ka të drejtë të dhunojë askënd”, thanë familjarët e të riut.
Rustemaj njihej si përdorues droge dhe mjekët dyshohet se i kanë dhënë overdozë metadon për qetësim.