Projekti i kredive të buta për çiftet dhe familjet e reja do të vijojë edhe në mandatin e dytë të kryebashkiakut Veliaj. Në takimin me disa familje të reja, kandidati i i PS për Bashkinë e Tiranës siguroi se pas suksesit të katër viteve të para, Bashkia e Tiranës do ta vijojë programin, si dhe paketën mbështetëse edhe për 4 vitet e ardhshme.
“Bashkia e Tiranës ka paketën më të madhe të strehimit social që ka pasur ndonjëherë Shqipëria. Japim çdo muaj mijëra bonuse sociale për ata që janë në nevojë dhe ndoshta nuk janë në nevojë ekstreme për banesë sociale, por janë në nevojë që dikush t’i ndihmojë me qiranë, dhe bonusi i qirasë është ndoshta një nga gjërat më të mirat që kemi bërë. Filluam me kredinë e butë, ku çdo vit kemi pasur 1 mijë çifte të reja që e kanë përfituar. Mosha e të dyve në çift duhet të jetë nën 70 vjeç, pra nga 35 vjeç mesatarisht secili ose më poshtë, që mund të kenë ardhur nga qytete të tjera, që sapo e kanë filluar jetën në Tiranë, që sapo janë bërë me fëmijë, që nuk iu del edhe për qiranë, edhe për fëmijën, edhe për pajisjet elektroshtëpiake, edhe për të jetuar. Kredia e butë, ku bashkia paguan interesin dhe çdo familje paguan vetëm këstin e principalit në vend që çdo muaj të paguajë qira, praktikisht çdo muaj blen një metër katror të shtëpisë që do ta ketë gjithë jetën për të fituar dhe për të filluar një jetë dinjitoze në Tiranë. Duam që t’i vazhdojmë këto projekte dhe duam që t’i forcojmë”, deklaroi Veliaj.