Regjistrimi i fëmijëve në klasë të parë do të bëhet i mundur edhe kur ata nuk kanë mbushur moshën 6 vjeç. Këshilli i Ministrave ka miratuar ditën e sotme një sërë ndryshimesh në ligjin e arsimit parauniversitar, ku një ndër to është edhe regjistrimi i fëmijëve në klasë të parë edhe nën moshën 6 vjeç.
“Një ndër ndryshimet e kaluara është edhe regjistrimi i nxënësve edhe para se të mbushin moshën 6 vjeç në klasë të parë, me kushtin që deri në datën 31 dhjetor të atij viti, të mbushin 6 vjeç. Nuk është e detyrueshme, por është vetëm për ato raste kur prindërit e kërkojnë, sepse fëmijët e tyre vijnë nga arsimi parashkollor që dinë të shkruajnë dhe lexojnë dhe që janë plotësisht gati për ndjekur klasën e parë”, ka deklaruar ministrja e Arsimit dhe Sportit, Evis Kushi, gjatë raportimit të vendimeve të miratuara në mbledhjen e Këshillit të Ministrave.