Policia e Tiranës vijon kontrollet për kapjen e personave që qarkullojnë me armë zjarri me vete apo që janë të shpallur në kërkim.
Gjatë një aksioni të fundit, policia ka arrestuar brenda një lokali një 48-vjeçar që mbante armë zjarri me vete. Në pranga ka rënë dhe një shtetas tjetër për veprën penale “Moskallëzimi i krimit”, si dhe është sekuestruar një armë zjarri dhe municion luftarak.
Njoftimi i policisë:
Shërbimet e Komisariatit të Policisë Nr. 2, në bazë të informacione se në ambientet e një lokali në lagjen “Ali Demi”, ndodhej një shtetas i cili mbante armë zjarri me vete, kanë organizuar punën dhe kanë bërë kapjen dhe arrestimin në flagrancë të shtetasit Fatmir Peposhi, 48 vjeç.
Gjatë kontrollit të ushtruar në tavolinën ku po qëndronte ky shtetas, u gjet dhe u sekuestrua një armë zjarri dhe një krehër me 5 fishekë.
Në vijim të veprimeve u arrestua në flagrancë edhe shtetasi Bledar Gjinishi, 47 vjeç, pasi kishte dijeni për armën, por nuk ka treguar.
Materialet i kaluan Prokurorisë së Rrethit Gjyqësor Tiranë, për veprat penale “Armëmbajtja pa leje” dhe “Moskallëzimi i krimit”.