Eraldo Çinari është kthyer ashtu siç e kishte ëndërruar, me një gol në derbi, duke i dhënë Partizanit një fitore që i mungonte prej më shumë se një vitit në duelin përballë Tiranës. Sulmuesi, në ndeshjen e parë pas përundimit të pezullimit të FIFA-s, vendosi derbin me rrjetën e tij në pjesën e dytë të sfidës, duke kthyer të kuqtë në vendin e dytë në renditje e duke fundosur Tiranën që tani e sheh veten shumë larg kreut.
Sfida mes dy skuadrave ishte shumë e luftuar, me raste nga të dy krahët sidomos në pjesën e parë të saj. Por në të dytën, ritmi i lojës ra disi, edhe për shkak të dy kartonëve të kuq, për Bardhin e Bathën, brenda pak minutash. Ishte Daja ai që gjeti zëvendësimin e duhur, duke aktivizuar sulmuesin, i cili ia shpërbleu me një gol vendimtar kur mbeteshin pak minuta para fundit të sfidës, për t’i dhënë fund makthit të tij dhe të kuqve të cilët nuk i gëzoheshin një suksesi në këtë ndeshje që nga viti 2019.