Deri në fillim të tetorit, Motaz Azaiza ishte vetëm një fotograf i ri në rrjetet sociale me pak ndjekës. Sot, ai është një nga gazetarët dixhitalë më të njohur që përshkruan atë që po ndodh në Gaza, ndërsa konflikti Izrael-Hamas vijon e përkeqësohet. Përditësimet e Azaiza ndiqen me vëmendje nga mbi 7 milionë njerëz në mbarë botën.
Fotografi, i cili punon për Agjencinë e Kombeve të Bashkuara për Ndihmën dhe Punën për Refugjatët Palestinez, është i vendosur në Gaza dhe ka postuar në lidhje me operacionet e ndihmës, bombardimet dhe vdekjet.
“Unë nuk kam fjalë për ju, prandaj kam rrezikuar jetën time për t’ju treguar gjithçka që kam gjetur dhe gjithçka që po shoh”, tha ai në një video të postuar në rrjetin e tij social në “Instagram”.
“Çdo moment që unë kap është për ju, në mënyrë që bota të marrë masa”, shtoi ai.
Realitetet e luftës
Videot e Azaizës tregojnë pasojat e konfliktit. Disa ndjekës e konsiderojnë burimin e tyre më të besueshëm për të mësuar më shumë rreth konfliktit.
“Gjëja e parë që bëj kur zgjohem në mëngjes është të kontrolloj ty dhe pjesën tjetër të gazetarëve të mrekullueshëm. Ne jemi duke u lutur gjatë gjithë kohës për ju. Puna jote është e jashtëzakonshme dhe po bën ndryshim. Bekime”, shkroi njëri.
Përveç bombardimeve, Azaiza përshkruan edhe vështirësitë e përditshme dhe gëzimet e vogla të palestinezëve në Gaza.