11 minuta zgjati seanca plenare e kësaj të enjte në Kuvendin e Shqipërisë, ku munguan dy figurat e Rithemelimit, Gazment Bardhi dhe Flamur Noka. Për shkak të skenarit të Rithemelimit, të cilët kishin ndezur zhurmues dhe bllokuan foltoren, kryeparlamentarja Lindita Nikolla kaloi direkt në votim.
Deputetët socialistët ngritën kartonin jeshil për të gjitha pikat e rendit të ditës mes zhurmuesve dhe pankartave. Opozita ka vendosur të bllokojë punimet e Kuvendit, pasi sipas saj mazhoranca i ka pamundësuar ngritjen e komisioneve parlamentare dhe nuk pranon zëvendësimin e anëtarëve të komisionit të reformës zgjedhore.
Lexo edhe :
Related Posts
Ndonëse pa liderin e tyre Sali Berishën, tashmë në ”arrest shtëpie” prej 30 dhjetorit, deputetët demokratë vijuan të pengojnë punimet normale në seancën e Kuvendit. Kurse deputetët e Bashës, u ulën në karriget e tyre dhe panë kaosin e kolegëve demokratë. Tymueset munguan në këtë seancë, si dhe grumbulli i karrigeve në foltoren e Kuvendit. PS miratoi me 73 vota pro projektligjet dhe aktet normative pa patur debat mes palëve.
Më konkretisht, seanca plenare shqyrtoi:
Projektligji “Për ratifikimin e marrëveshjes së financimit, ndërmjet Republikës së Shqipërisë, përfaqësuar nga Këshilli i Ministrave i Republikës së Shqipërisë, Republikës së Francës, përfaqësuar nga rajoni Provence-Alpes-Cote D’Azur, dhe Komisionit Evropian, për programin “(lnterreg VI-B) Euro Mesdhe (EURO MED) 2021-2027″”, u miratua me 73 vota pro, 0 kundër dhe 0 abstenim.
Projektligji “Për ratifikimin e marrëveshjes, ndërmjet Republikës së Shqipërisë dhe Bashkimit Evropian, për aktivitetet operacionale të kryera nga Agjencia Evropiane e Rojës Kufitare dhe Bregdetare në Republikën e Shqipërisë”, u miratua me 73 vota pro, 0 kundër dhe 0 abstenim.
Anti Normativ nr. 6, datë 14.12.2023 “Për disa ndryshime dhe shtesa në ligjin nr. 84/2022 “Për buxhetin e vitit 2023”, të ndryshuar”, u miratua me 73 vota pro, 0 kundër dhe 0 abstenim.
Akti Normativ nr. 7, datë 14.12.2023 “Për disa shtesa dhe ndryshime në ligjin nr. 29/2023, “Për tatimin mbi të ardhurat”, të ndryshuar”, u miratua me 73 vota pro, 0 kundër dhe 0 abstenim.
Akti Normativ nr. 8, datë “Për marrjen e masave urgjente për mbrojtjen dhe përmirësimin e infrastrukturës për trajtimin e ujërave të ndotura që shkarkohen pranë ose në ujëra larëse”, u miratua me 73 vota pro, 0 kundër dhe 0 abstenim.
Projektligji “Për miratimin e buxhetit faktik të vitit 2022”, u miratua me 73 vota pro, 0 kundër dhe 0 abstenim.
Projektligji “Për shfuqizimin e ligjit nr. 115/2017 ‘Për krijimin e Agjencisë Kombëtare të Diasporës’, të ndryshuar”, u miratua me 73 vota pro, 0 kundër dhe 0 abstenim.
Projektligji “Për indeksimin e pagës së punonjësve dhe nëpunësve në Republikën e Shqipërisë”, nismë e deputetëve të pakicës parlamentare, znj. Monika Kryemadhi, znj. Erisa Xhixho dhe z. Petrit Vasili, u rrëzua me 73 vota kundër, 0 pro dhe 0 abstenim.