Një vizatim ka sjellë telashe për një nxënës në Serbi. Mediat vendase raportojnë se nxënësi është ndaluar nga policia pasi kishte postuar në internet një vizatim të një klase me figura të gjakosura. Në vizatim ai kishte bërë figura të gjakosura të shtrira pranë tavolinave ndërsa një njeri mbante një armë.
Kjo ka alarmuar prindërit në Serbi, të cilët kanë njoftuar autoritetet e shkollës dhe policinë. Të riut i është caktuar masa e ndalimit deri në 48 orë dhe me kallëzim penal do të dërgohet në Prokurorinë Themelore Publike në Kikindë. Kujtojmë që pak ditë më parë Serbia u trondit nga dy masakra.
Një 14 vjeçar vrau me armë zjarri 9 persona, rojen e shkollës dhe tetë nxënës ndërsa plagosi disa të tjerë në një shkollë në Beograd. Ndërsa pak orë më pas, një 21 vjeçar qëlloi me breshëri ndaj njerëzve të rastësishëm në rrugë duke vrarë tetë persona dhe plagosur disa të tjerë.