Deputeti i PD Edi Paloka, ka reaguar në një postim në Facebook, për fjalët e mira që Sekretari amerikan Antony Blinken i drejtoi kryeministrit Edi Rama.
“Jam kurioz të di se çfarë mendojnë ata ‘opozitarët’ e L.B , ata ‘euroatlantikët’ për vlerësimet që Sekretari i ka bërë Ramës ??? Kur Blinken firmosi ‘non grata’-n e Berishës , i thashë L.B se ky ishte një akt kundër PD , për të mbështetur Ramën. Në atë moment L.B ishte dakord me këtë të vërtetë, por në shtator, pasi e kapën për vesh, ndërmori aktin e përjashtimit të Berishës pa pyetur asnjë prej nesh. Justifikimi i tij, pas reagimit tim se me atë akt po shkaktonte PD, ishte se pas largimit të Berishës, ‘ata’ do godisnin Ramën…!!! I bëra të qartë që në rastin më të mirë kjo ishte naivitet dhe logjikë absurde. Goditja e Berishës bëhej pikërisht për të kundërtën, pra për të mbrojtur dhe fuqizuar Ramën. Por L.B vazhdoi edhe për ca vite të tjera të mashtronte ata që e ndiqnin sepse shumë shpejt ‘ata’ do largonin Ramën dhe do i dhuronin pushtetin L.B! Prandaj jam kurioz sot të di, jo çfarë mendon L.B , sepse ai ka qenë i qartë që kur e morën peng, por ata që i shkojnë pas duke përdorur të njëjtat justifikime. Çfarë mendojnë sot për njeriun e Sorosit që firmosi për të shpallur ‘non grata’ Berishën dhe quan ‘udhëheqës e kryeministër të shkëlqyer’ Ramën? Përderisa ata pranojnë si të mirëqena çdo gjë që thotë Blinken, atëherë i bie që si ‘opozitarë të vërtetë’ të pranojnë edhe vlerësimet për Ramën…”, ka shkruar Paloka.
