Prokuroria Speciale ka treguar masat që janë marrë deri më tani për vjedhjen e 2.1 milionë eurove nga Thesari i Shtetit në Kosovë. Sipas Insajder, mësohet se deri më tani janë bllokuar 600 mijë euro si dhe janë sekuestruar katër vetura, vlera e të cilave është rreth 100 mijë euro.
Lajmi është bërë i ditur, përmes një komunikimi për mediat të prokurorisë, ku gjithashtu është treguar se janë bllokuar 34 llogari bankare të bizneseve në të cilat janë transferuar parat nga i dyshuari Kadri Shala pronar i (LDA Group Sh.p,k). Ndërkohë është bërë kërkesa te autoritetet e Turqisë, lidhur me transferimin prej 440 mijë eurove.
“Deri më tani lidhur me këtë rast janë arrestuar dy (2) persona të cilët gjenden në paraburgim për veprat penale ‘Keqpërdorim i detyrës zyrtare dhe autorizimit’ nga neni 414 paragrafi 2 dhe 3 pika 3.4 në lidhje me paragrafin 1 të KPRK-ës dhe ‘Shpëlarja e parave’ nga neni 302 të KPRK-së, lidhur me veprën penale ‘Pastrimi i parave’ nga neni 56 i Ligjit nr. 05/L-096 për parandalimin e pastrimit të parave dhe luftimin e financimit të terrorizmit”, thuhet në komunikatën për medie.
Sakaq, hetimet për këtë rast janë duke vazhduar.
Më 21 tetor në Kosovë janë vjedhur nga Thesari i Shtetit 2 milionë euro. Ministrja e finacave Hykmete Bajrami ka dalë në një konferencë për shtyp ku ka treguar se parat e ndara në 4 transaksione janë dërguar në llogarinë e një operatori ekonomik. Ndërkohë të arrestuar janë Labinot Grudën, zyrtari në Ministrinë e Financave si dhe Kadri Shalën përfaqësues ligjor në Kompaninë LDA Group SHPK, kompania në të cilën janë transferuar paratë nga Thesari. Të dy të arrestuarit kanë deklaruar se janë të pafajshëm. Sakaq, është bërë e ditur se vjedhja ka ndodhur për 8 minuta.