Prej disa ditësh janë shtuar zërat se ministrja e jashtme në qeverinë “Rama 3” do të jetë Vlora Çitaku. Lajmi u konfirmua dhe nga gazetari Milaim Zeka, i cili komentoi dhe vizitën që Çitaku kishte pasur në Tiranë pak ditë më parë, dhe ku mendohet se është takuar kokë më kokë me Ramën.
Lidhur me këto zëra, kryetari në detyrë i PDK-së, Enver Hoxhaj thotë se nuk është takuar me Çitakun që të bisedojë për këtë.
“Nuk jam takuar me Çitakun që të bisedojmë se çfarë po raportohet nëpër media”, tha Hoxhaj në emisionin “Prime” të RTK-së.
Ndërsa thotë se po të vendosej Çitaku në krye të ministris së Punëve të Jashtme të Shqipërisë do të ishte mirë.
“Do të ishte mirë nëse ndodh, por nuk kam ndonjë informatë”, shtoi Hoxhaj.
Vetë kryeministri Edi Rama në një darkë që pati me ministrat dhe deputetët e PS-së tha që qeveria që do të nisë punë nga shtatori, do të ketë në përbërje të saj dhe persona që nuk janë deputetë, apo nuk kanë qenë pjesë e fushatës elektorale të 25 Prillit.