Detaje të reja po dalin për vrasjen e efektivit të policisë nga kolegu i tij, brenda në komisariatin nr.3, në Tiranë.
Një prej kolegëve të tjerë që ka qenë më afër vendit të ngjarjes, ka dhënë dëshminë e tij përpara autoriteteve.
“Kur ndodhi ngjarja unë kam qenë në pjesën e oborrit të komisariatit. Në ato momente, Çaush Saliasi ishte te shkallët dhe ishte duke dredhur një cigare. I fola Çaushit dhe u përshëndetëm me njëri-tjetrin. Në këtë çast, Ludjan Zaimi doli nga klasa dhe erdhi pas meje. Unë e pyeta: Si je? Pse je i mërzitur? Më tha: Nuk kam asgjë, por hapu dhe shtyhu pak pas. Unë i them ‘pse’, por ai ngul këmbë dhe më thotë sërish ‘shtyhu pas, shtyhu’. Në atë moment ai nxjerr armën e shërbimit dhe i them ‘çfarë po bën kështu’? Por ai nuk u kthye dhe u drejtua me armën në dorë drejt Çaush Saliasit dhe i thotë këtij të fundit: ‘Tani do të sqarohemi bashkë’. Menjëherë Çaushi u ngrit në këmbë dhe u fut te klasa qç t’i shmangej, por Ludian Zaimi e qëlloi me armën e shërbimit. Edhe pse Çaushi ra në tokë, Ludiani e qëlloi sërish edhe disa herë”, përfundon dëshmia e policit me iniciale K.Q.