Në seancën gjyqësore për vrasjen e Santiago Malkos, ka dëshmuar Muhamet Duka, babai i të akuzuarit Leonard Duka. I thirrur nga mbrojtja, ai ka deklaruar se nuk ka njohje personale me viktimën apo të përfshirët në ngjarje dhe se nuk ka pasur dijeni për ndonjë konflikt mes djemve të tij dhe personave të përmendur. Ai theksoi se është marrë me biznesin e vet dhe nuk është përfshirë në jetën shoqërore apo aktivitetet e të birit.
Avokatja: A e njihni shtetasin Santiago Malko?
Duka: Nuk e njoh dhe nuk kam pasur asnjë konflikt. Mesa di unë, as djemtë e mi nuk kanë pasur konflikt. Në dijeninë time, nuk e di nëse kanë pasur probleme me Ervis Martinajn, unë nuk e njoh.
Prokurori: Aleksandër Maxhaku, e njihni?
Duka: Është nipi im, djali i motrës, e thërrasim Leksi, Aleks, varet. Kam shumë vite pa e takuar, thuajse 6 vjet, nuk e di ku është. Dritan Again e njoh, është nga vendi ynë; një stërmbesë e jona e ka burrë. E kemi deri diku tonin, nuk është i huaj. Dritanin e kam parë, djemtë e mi si çunat që rrinë. Oltion Lokën e kam parë, e njoh nga lagjja. Ai ka pas banuar në Shëngjergj. Olti i thërrisnin shkurt, nuk e di me kë rrinte nga çunat. Fatmir Dogjën e kam dëgjuar në televizor. Ilir Selmanin e kam dëgjuar në TV, por si person nuk e njoh. Blendi Tetën nuk e njoh, e kam dëgjuar në media.
Prokurori: Jeni në dijeni të një pajtimi mes disa djemve me mbiemër Mumajesi?
Duka: E kam dëgjuar si mbiemër, Revelino Mumajesi e kam parë si çun lagjeje. Unë e di që djali paguante tatimet në shtet, ishte i rregullt. E kam takuar shumë rrallë. Ervis Martinajn e kam dëgjuar, as e njoh, as e kam parë ndonjëherë, në media e kam dëgjuar. Edhe emrin e Santiago Malkos e kam dëgjuar në media.