Partia Socialiste është duke mbledhur në çdo bashki të vendit Asambletë Socialiste në të cilat mbledh propozimet dhe hedh për diskutim kandidaturat për kryetarë bashkish për zgjedhjet e 30 qershorit.
Këtë fundjavë Rama ishte në qarkun Fier ku ka zhvilluar takime pune me strukturat e këtij qarku.
Burime për Report TV, bëjnë me dije emrat e tjerë të kandidatëve potencialë për bashkitë e këtij qarku, veç rikandidimit të Subashit që u bë nga vetë Rama.
Në Patos, pritet të kandidohet deputetja Antoneta Dhima. Ajo ka mbajtur disa funksione drejtuese në institucionet e Fierit dhe tani është në mesin e mandatit të saj të dytë në Kuvend, anëtare e Komisionit të Ekonomisë dhe Sigurisë Kombëtare.
Në Roskovec pritet rikandidimi i Majlinda Bufit ndërsa në Divjakë ajo e Fredi Kokoneshit.
Në Lushnjë situata është më interesante, pasi veç një grupimi që dëshiron rikandidimin e Fatos Tushes, ka nga ata që kanë propozuar kandidimin e kryetares së partisë, Lindita Buxheli. Ndërsa burimet flasin edhe për një kandidim të mundshëm të gjyqtarit të shkallës së parë, Tiranë, Artan Gjermeni.
Në qarkun Vlorë ka një situatë ende të pa qartësuar. Për bashkinë e Vlorës grupimi që mbështet Dritan Lelin duket më këmbëngulës, por edhe grupimi që mbështet kandidimin e Fate Velajt mendojnë që do fitojnë “besimin” e Ramës.
Ndërkohë në zonat e tjera të këtij qarku ka pasur disa emra të hedhura në propozim nga asambletë dhe PS po bën disa sondazhe për të matur kandidaturat më të fuqishme.
Ndërkohë Report TV ka zbardhur kandidaturat kryesore në të gjithë vendin disa javë më parë.
Qarku Fier
Fier: Armando Subashi
Patos: Antoneta Dhima
Roskovec: Majlinda Bufi
Divjakë Fredi Kokoneshi
Lushnje: Artan Gjermeni ose Lindita Buxheli
Qarku Vlorë
Vlorë Dritan Leli ose Fate Velaj
Selenicë: Vullnet Sinaj
Delvinë: Pandi Zhonga ose Dritan Xhaferi
Sarande: Ardian Kola, Ardian Gurma, Alket Qendro ose Sheme Lulo
Konispol Shuaip Beqiri
Finiq (Në diskutim për t’jua lënë aleatëve të minoritetit grek)