Afërdita Laze mbeti e plagosur mbrëmjen e djeshme bashkë me të shoqin pasi persona të maskuar tentuan t’i grabisnin në shtëpi. Ngjarja ndodhi në Allias të Tiranës.
Ndërkohë mësohet se gruaja e cila ndodhet në spitalin e Traumës jashtë rrezikut për jetën ka dhënë dëshminë e saj ku ka rrëfyer para oficerëve të policisë momentet e tmerrit.
Ajo tha se e gjithë skena e dhunshme u zhvillua në sy të vajzës së tyre 17-vjeçare.
“Ishim në dhome. Dëgjuam një zhurme dhe vajzën që bërtiti; “kush eshte aty?”. Doli Petriti (burri) të shihte kur u ndesh në korridor me 2 veta të maskuar. Dukeshin të rinj. Ata bërtisnin vetëm “lekët, lekët” dhe i drejtuan pistoletën. Petriti tentoi t’i nxjerrë jashtë nga shtëpia, ata e qëlluan. Kur u afrova dhe mua me qëlluan dhe ikën me vrap”, tha gruaja.
Siç është raportuar dhe më herët, si fillim u plagos i zoti i shtëpisë, Petrit Laze, i cili ka marrë plagë në bark dhe ndodhet më rëndë, ndërsa gruaja është plagosur në pjesën e poshtme të gjymtyrëve.