Damian Gjiknuri, i cili i zuri vendin Taulant Ballës në drejtimin e Elbasanit, siç duket ka bërë paqe me paraardhësin e tij. Vetë Gjiknuri ka qenë i pranishëm në Elbasan, aty ku Balla bëri përshëndetjet e fundit me socialistët e këtij qarku, për t’i kaluar stafetën numrit DY të PS-së. Ndryshe nga dita kur u emëruan drejtuesit e qarqeve, këtë herë dy socialistët përcollën pozitivitet, duke treguar se i kanë sheshuar pakënaqësite, pikërisht siç paralajmëroi vetë Gjiknuri në mbledhjen e parë që zhvilloi si Sekretar i Përgjithshëm i PS-së.
“Nuk e di pakënaqësinë, mund të ketë konstatime të natyrës së anektodave sepse unë nuk kam dëgjuar. Mund të ketë ndonjë mosrealizim të ndonjë pritshmërie, por jam i bindur që do të fashitet rrugës,”- tha Gjiknuri më 7 shtator.
Dhe sot, ai komplimentoi Ballën se ka bërë një punë vërtet të mirë në Elbasan.
“Kënaqësi të rikthehem sërish në Elbasan, Qarkun ku nisa rrugëtimin tim si deputet i Partisë Socialiste. Bashkë me Taulantin, Evisin dhe Blendin takuam strukturat drejtuese në parti e pushtet vendor. Përgjegjësinë e dhënë në Asamblenë Kombëtare për drejtimin e këtij Qarku do ta përkthejmë së bashku në punë e përkushtim maksimal. Elbasani ka patur një rezultat shumë të mirë në zgjedhjet e fundit. Është koha që fryma e bashkëpunimit me njëri-tjetrin, përmbushja e premtimeve ndaj çdo qytetari dhe ri-organizimi i Partisë Socialiste në çdo nivel të na garantojnë një tjetër rezultat rekord në zgjedhjet e radhës. Jam besimplotë se do të çojmë përpara punën e mirë dhe do t’ia dalim!”- shkruan Gjiknuri.
