Ish-kryetari i Gjykatës së Kasacionit, sot Gjykata e Lartë Zef Brozi që nga SHBA vijon të jetë i shqetësuar për fatet e vendit.
Ai kërkon nga të gjitha organet ligjzbatuese dhe institucionet më të larta të shtetit që të mos e lejojnë Berishën, Bashën dhe disa deputetë te tjerë të dhunojnë institucionet.
Për Brozin, ky kontigjent mbështetet nga organizata terroriste që duan të destabilizojnë vendin.
“Ligji e shteti ligjor nuk lejojnë askënd, qofshin këta drejtues partish, deputetë, a qytetarë, që të cënojë a pengojë zgjedhjet e 7 Majit dhe 18 Qershorit.
Prokuroria, Policia, Gjyqësori, Presidenti, Qeveria dhe gjithë Institucionet e tjera të shtetit do t’i bëjnë dëm të madh Shqipërisë nëse do të vazhdojnë të tolerojnë Berishën, Bashën dhe disa deputetë opozitarë që po dhunojnë haptazi ligjet dhe rregullat e demokracisë.
Organizata terroriste, disa shtete anti-perëndimore dhe disa shërbetorë të tyre në Shqipëri, dhe ata që kanë frikë personale nga Vetingu, po bëjnë gjithçka munden të destabilizojnë Shqipërinë në këtë moment aq jetik e shpresëdhënëse për realizimin e ëndrrës europiane të vendit tonë të dashur.
U bëj apel të gjithë demokratëve të ndershëm dhe qytetarëve të jenë vigjilentë, të zbatojnë ligjet dhe respektojnë rregullat e demokracisë dhe të mos bëhen viktima të disa drejtuesve e politikanëve të inkriminuar që kanë marrë peng Partinë Demokratike”, apelon Brozi. /GazetaTema