Enver Roshi është deputet i Kuvendit të Shqipërisë nga listat e LSI-së, pas lënies së mandateve dy vite më parë nga ana e opozitës. Dy muaj na ndajnë nga zgjedhjet e reja parlamentare të 25 prillit dhe partitë politike tashmë kanë nisur lëvizjet e tyre si dhe hartimin e listave të kandidatëve.
Por cila do të jetë e ardhmja politike e Enver Roshit. Në këtë prononcim për tirananews.al doktori i njohur i shëndetit publik thotë se nuk ka ofertë konkrete duke shprehur dëshirën e tij për të qenë kandidat në qarkun e Elbasanit, duke qenë se origjina e tij është nga Gramshi.
“Bazuar në përvojën time profesionale si mjek dhe profesionist i shëndetit publik dua të jap kontributin tim politik me atë përvojë që kam. Nuk kam një vend të sigurtë në lista, po shoh kërkesat që po vijnë, po bazuar dhe që zona ime është një zonë e majtë, Gramshi dhe Elbasani, ku bëhet dhe gara e fortë dhe ku kam dhe ndikim më shumë. Dhe në Tiranë kam ndikim më shumë pasi kam një komunitet të gjerë nga Gramshi, unë kam punuar në Kukës, Pogradec, e njoh gjithë Shqipërinë”, thotë Roshi.
Sipas tij gara do të jetë shumë e fortë por megjithatë personalisht nuk ka ambicien e egër të karrierës politike.
“Mendoj se gara do të jetë shumë e fortë dhe jam në pritje duke i parë gjërat me qetësi sepse kam dhe një profesion që jam pedagog dhe nuk kam atë ambicien e egër që kanë disa që futen në politik e mos të jenë asgjë. Dua të vë profilin tim intelektual në shërbim të politikës dhe në shërbim të njerëzve. Kjo është ajo që më karakterizon”, thotë ai.
Dy vite më parë partitë e opozitës vendosin të lënë mandatet dhe një sërë emrash pasues në listë refuzuan të pranojnë mandatin. Enver Roshi ishte ndër ata që nuk refuzoi sepse i qëndron idesë së tij për të vendosur përvojën profesionale në kontributin e tij në politik.