Kryeministri i Maqedonisë Zoran Zaev dhe kryetari i BDI-së, Ali Ahmeti kanë arritur marrëveshjen për kandidaturën e përbashkët presidenciale, ai do të jetë Stevo Pendarovski. Fillimisht ka qenë dakordësia mes dy partive qeveritare, LSDM dhe BDI ndërsa më vonë do të ishte takimi i Zaev me strukturat partiake duke konfirmuar kandidaturën ndërkohë pritet të mbështetet dhe nga partitë e tjera, Alternativa dhe PDSH-ja.
Pendarovski njihet si anëtar prej vitesh i LSDM-së madje në vitin 2014 ka qenë sërish kandidaturë për president e Zaevit, asojkohe në opozitë, por humbi kundër kandidaturës së VMRO- DPMNE, Gjorge Ivanov.
Përsa i përket kandidaturave të tjera, Aleanca për Shqiptarë dhe BESA kanë zgjedhur kandidaturën e pavarur të Blerum Rekës ndërsa Gordana Siljanovska-Davkova është kandidatura e partisë opozitare VMRO- DPMNE. Raundi i parë zgjedhor për zgjedhjet e gjashta presidenciale është caktuar për më 21 prill, ndërsa i dyti do të mbahet më 5 maj. Duhet theksuar se këto janë zgjedhjet e para për presidentin e Maqedonisë së Veriut.