Zgjedhjet e 25 prillit në Shqipëri nxorrën fitues Partinë Socialiste teksa nga procesi i numërimit të votave ka mbetur pa u numëruar vetëm një kuti, e cila ndodhet në Lezhë dhe ku kryeson PD.
Në total janë numëruar 5198 kuti nga 5199 gjithsej. Partia Socialiste ka siguruar deri tani 74 mandate, PD 59, LSI 4 dhe PSD 3 mandate.
Rreth 3 milionë e 600 mijë shqiptarë me të drejtë vote u thirrën në votime më 25 prill për të zgjedhur 140 deputetët e Parlamentit të ardhshëm.
Pas ndryshimeve në Kodin Zgjedhor, zgjedhjet e 25 Prilli, sjellin risi. Në të njëjtën Fletë Votimi Zgjedhësit votuan për partinë dhe kandidatin preferencial për deputet, që në Fletën e Votimit u identifikua nga një numër e jo emri i tij. Ligji saktëson se së pari numërohen votat për subjektet zgjedhore e më pas, për kandidatët për deputetë.
Lista fituese e kandidatëve për deputetë pas numërimit të votave për partitë, mund të thyhet vetëm nëse një kandidat që renditet poshtë vijës së kuqe ka marrë më shumë preferenca se mesatarja e votave të partisë. Zgjedhjet e 25 Prillit u zhvilluan në kushte tejet të veçanta, për shkak të pandemisë së COVID-19.
Në Tiranë PS ka marrë 226842 vota ose 48.7%. PD 182335 vota, ose 39.1%, LSI 27945 vota ose 6% dhe PSD 13273 vota, ose 2.8%. Mandatet ndahen 18 për PS, 15 për PD, 2 LSI dhe 1 PSD.