Burime pranë Bashkisë Bulqizë bëjnë me dije se situata në pyjet e përfshira nga zjarret është mjaft kritike.
Në masivin pyjor të Tërnovës, Njësia Administrative Zerqan zjarri prej disa ditësh është aktiv dhe ai ka përfshirë pyjet e lartë, pishë dhe ah. Ndërhyrjet e deritanishme nuk kanë mundësuar shuarjen e tyre.
Po ashtu në fshatrat Shpukth, Bllacë, Val dhe Fushë Bulqizë situata mbetet ende problematike, dhe po punohet intensivisht për shuarjen e tyre. Në Gjoricë, zjarret pranë varrezave dhe në fshatin Viçisht janë vënë plotësisht nën kontroll, duke stabilizuar situatën në këto zona.
Kryetarja e Bashkisë Festime Mjeshtri tha se disa vatra janë aktive dhe se terreni i vështirë pengon punën e zjarrëfikësve dhe vullnetarëve.
“Edhe pse të gjitha strukturat janë në gatishmëri dhe po bëjnë përpjekje të jashtëzakonshme për të menaxhuar vatrat e zjarrit, situata mbetet ende problematike në disa Njësi Administrative të Bashkisë Bulqizë. Terreni i vështirë në disa zona e vështirëson punën e zjarrëfikësve, të cilët po përpiqen të parandalojnë përhapjen e flakëve. Duke falënderuar të gjithë qytetarët që vullnetarisht i janë bashkuar ekipeve të emergjencës për shuarjen e flakëve, ju bëjmë thirrje që të bëni kujdes dhe të tregoheni bashkëpunues për të shmangur veprimet e pakoordinuara”, u shpreh Mjeshtri.