Prej afro 48 orësh, flakët vijojnë të përfshijnë sipërfaqe të mëdha me pyll me pisha në fshatin Ribaj, në Bashkinë e Mallakastrës.
Zjarri, i cili nisi në mëngjesin e ditës së djeshme, ka avancuar në drejtim të fshatit Lofkënd, duke djegur dhjetëra hektarë pyje dhe bimësi.
Gjatë ditës së djeshme, në terren u angazhuan forca të shumta zjarrfikëse, ndërsa operacioni u mbështet edhe nga ajri me dy helikopterë. Në orët e mbrëmjes, flakët u konsideruan nën kontroll, por gjatë natës vatra u riaktivizua.
Sot, në ndihmë të forcave në terren është angazhuar edhe avioni Air Tractor AT-802F Fire Boss, i cili po operon për herë të parë në zonën e Mallakastrës, duke ndërhyrë nga ajri në vatrat më problematike.
Megjithëse ndërhyrja nga toka dhe ajri vijon me intensitet, era e fortë dhe temperaturat e larta po favorizojnë përhapjen e flakëve, të cilat vazhdojnë të djegin sipërfaqe të konsiderueshme me pisha.
Forcat zjarrfikëse mbeten të angazhuara në izolimin e vatrave aktive dhe mbrojtjen e zonave të banuara. Në afërsi të fshatrave janë stacionuar mjete dhe efektivë për të parandaluar çdo rrezik për banorët dhe banesat.