11 fëmijë në vendin tonë morën statusin “Fëmijë në përkujdesje të Republikës”, për shkak se prindërit e tyre kanë humbur jetën në krye të detyrës, duke mbrojtur të tjerët. Në këtë ceremoni të zhvilluar në ambientet e Kryeministrisë ishte i pranishë, edhe kreu i qeverisë, Edi Rama, i cili e konsideroi këtë si një përmbushje të amanetit se fëmijët e heronjve nuk do të lihen asnjë moment vetëm.
Në kuadër të këtij statusi, këta fëmijë që u morën nën përkujdesjen e shtetit do të financohen prej tij deri në moshën e përfundimit të studimeve të larta.
“U bënë mbrojtje të tjerëve, për ti dalë zot Atdheut. Të tillë ishin edhe njerëzit tuaj më të shtrenjtë, prindërit tuaj që jetojnë në kujtimet tuaja dhe kujtesën e kësaj shoqërie.
Ata lanë pas jo vetëm shembullin e tyre të admirueshëm, por edhe amanetin e heshtur për ne që të mos u lëmë asnjë çast vetëm. Ky takim është për ra shpallur të përmbushur atë amanet. U bë ligji i parë i këtij mandati të tretë.
Kujtimi i tyre i paharrueshëm u bë shtysa jonë e madhe, por edhe gjithë Shqipërisë. Republika jonë nuk i lë vetëm fëmijët e heronjve. Asgjë nuk e zëvendëson dot asnjëherë figurën e prindit. Por dhënia e kujdesit financiar për fëmijët e heronjve të republikës deri në përfundimet e studimeve të larta është një mbështetje kuptimplotë pas një periudhe të gjatë kohe”, tha Rama.