Cristiano Ronaldo rikthehet në fushë dhe Juventusi shijon tre pikët në kampionat pas tre barazimeve radhazi. Kampionët në fuqi fituan 1-4 në transfertë kundër Spezias dhe tashmë renditen në vend të dytë me 12 pikë, katër më pak se kryesuesit e Milanit.
Alvaro Morata zhbllokoi takimin pas çerek ore lojë, por vendasit gjetën barazimin me anë të milanistit Pobega (32′). Pjesa e parë nuk dhuroi më gola, teksa djemtë e Andrea Pirlos nuk u përmbajtën aspak në fraksionin e dytë të lojës.
Cristiano Ronaldo realizoi një dygolësh, teksa pati feste edhe për francezin Rabiot. Një fitore me “poker” në momentin e duhur për Juventusin, që sot feston 123-vjetorin e themelimit. Ardijan Ismajli u fut në fushë në minutën e 88-të, duke debutuar me Spezian.
Spektakël, 7 gola dhe përmbysje e çmendur në Torino-Lazio. Bardhekaltrit fituan 3-4 falë dy golave të Ciro Immobiles dhe Caicedos në minutat 95′ dhe 98′. Bremer dhe Belotti i dhuruan avatazhin ekipit granata në pjesën e parë, me Lazion që kishte kaluar e para në avantazh me anë të Pereiras.
Milinkovic-Savic barazoi ndeshjen në minutat e para të fraksionit të dytë, teksa emocionet e ruajtur për në fund. Lukic riktheu Torinon në avantazh në tre minuta përpara mbylljes së kohës së rregullt.
U mendua se vendasit morën tre pikët, por Ciro Immobile (me penallti) dhe Felipe Caicedo realizuan përmbysjen e pabesueshme në minutat shtesë, duke i dhuruar tre pikë tepër të rëndësishme ekipit të Simone Inzaghit.
Mërgim Vojvoda e zhvilloi të plotë takimin për ekipin e Giampaolos, ndërsa Vedat Muriqi e nisi si titullar, por u largua nga fusha në minutën e 57-të.