17-vjeçarja Irsa Muçollari vrau veten, dhe dyshohet për shkak se bullizohej nga bashkëmoshatarët. Sociologu Gëzim Tushi, thotë se intensiteti i këtij fenomeni këto kohë në shoqërinë shqiptare është shumë i lartë mes adoleshentëve.
”Fenomeni i ngacmimit ka ekzistuar edhe para 35 vjetësh. Edhe atëherë fëmijët ngacmojnë njëri tjetrin. Por sasia dhe intensiteti ishte verbal, kurse tani janë komplekse. Nuk krahasohet kjo tendence dhe sasi, nuk kam statistikë. Para 35 vjetësh vështirë të ketë humbur dikush jetën prej bullizimit. Kurse tani sasia e fëmijëve dhe adoleshentëve që kanë humbur jetën prej bullizimit është në rritje. Fenomen shqetësues. Limfa e bullizimit po bëhet shkatërrimtare”,-tha në ”Report TV”.
Sipas tij, adoleshentët po tregohen të pamëshirshëm me njëri-tjetrin. ”Këtë fenomen kemi kaq kohë që e diskutojmë. Diagnostikimet nuk janë të sakta dhe masat se çfarë duhet bërë nga institucionet në procesin e parandalimit në shkollë dhe familje. Këto raste që ndodhin, dhe raste të tjera të përsëritura kanë shkaqet e tyre.
Duhet ti konsiderojmë adoleshentët viktima të këtij realiteti dhe mungesës së veprimit të strukturave. Adoleshentët e sotëm po bëhen të pamëshirshëm ndaj njëri tjetrit dhe një pjesë e vetëvrasjeve, janë si rezultat i bullizimit tregon përgjegjësinë e kësaj shoqërie që po shpërbëhet. Adoleshentët ndodhen përballë mungesës së aftësisë për të vepruar”.