Si sot e 20 vite të shkuara, për herë të parë në Shqipëri një Kryetar Kuvendi do të jepte dorëheqjen për rrëzimin e një vendimi parlamentar. Nëse sot jemi mësuar që shumë nisma të rrëzohen nga Kushtetuesja, një akt i tillë nga një kryetar nuk është parë më.
Kryetari i Kuvendit aso kohe, Namik Dokle, do të jepte dorëheqjen në shenjë proteste ndaj vendimit të Gjykatës Kushtetuese që do të shfuqizonte një votim të Kuvendit për shkarkimin e prokurorit të përgjithshëm, Arben Rakipi.
Arsyeja për dhënien e dorëheqjes, do të shprehej ai, ishte “ruajtja e dinjitet të Kuvendit të Republikës së Shqipërisë dhe mbrojta e moralit të tij”.
“E jap dorëheqjen për të mbrojtur në mënyrën më modeste dinjitetin e kuvendit dhe për të shmangur çdo rrezik të krizës midis institucioneve,” tha ai.
Zoti Dokle tha se nuk kishte asgjë anti-kushtetuese në punën dhe vendimet e Kuvendit që ai drejtoi.
Ai tha aso kohe se dorëheqjen e jepte pasi vendimi i Gjykatës Kushtetuese nuk përputhet me moralin e tij politik, dhe shtoi se ai nuk mund të fillojë procedurat e rishqyrtimit të një vendimi që ai e quan të drejtë.