Duke marrë shkas nga ngjarja e 27-vjeçarit Jani Rrustemaj, i cili përfundoi në gjendje kome në spital pasi u ndalua nga policia për vjedhjen e një tapeti, drejtuesit e policisë kanë kërkuar kujdes në trajtimin e këtyre rasteve duke zbatuar procedurat standarde. 27-vjeçari si konsumator i lëndëve narkotike, në spital mori mbidozë metadoni dhe është në luftë me jetën.
Drejtori i Policisë së Tiranës, Tonin Vocaj ka porositur strukturat e 6 komisariateve të kryeqytetit të evitojnë kur është e mundur arrestimin e personave që njihen si përdorues të lëndëve narkotike. Strategjia që duhet të ndjekin forcat e rendit në këto raste është mbajtja e tyre në kontroll me specialistët e zonave më tepër sesa arrestimi.
Gjatë shoqërimit të këtyre personave, komisariatet janë porositur se duhet të jetë i pranishëm edhe mjeku përkatës të evidentohet gjendja e të ndaluarit, dhe t’i jepet ndihmë në rast se e ka të nevojshme.