Rezultatet e Kombwtares shqiptare nwn drejtimin e Christian Panucci kanw qenw mjaft dwshpwruese. Në 9 ndeshje, duke përfshirë sfida miqësore dhe të Ligës së Kombeve, kuqezinjtë kanë arritur që të marrin vetëm 2 fitore dhe një barazim. Në total janë 6 disfata për Shqipërinë, që mbylli aventurën në Ligën e Kombeve në vendin e fundi, por shpëtuan rënien në Ligën C në saj të një fitoreje të Norvegjisë, duke spostuar Qipron një Ligë më poshtë.
26 mars, Shqipëri-Norvegji 0-1
Kombëtarja shqiptare e futbollit humbi 0-1 ndaj Norvegjisë në miqësoren e luajtur në stadiumin “Elbasan Arena”, në një ndeshje ku trajneri Panucci eksperimentoi me formacionin dhe me zëvendësimet. Kuqezinjtë vuajtën disfatën përballë nordikëve në një përballje ku iu deshën 54 minuta për goditjen e parë në portë. Në momentin më të mirë të kuqezinjve, neglizhenca në prapavijë solli golin e Rosted, i pamarkuar në zonë që bëri të vlejnë centimetrat e tij mbi të tjerët në një goditje këndi. Grezda nga e majta e sulmit provoi të spikaste por goditja e tij ishte mbi traun e portës.
29 maj, Shqipëri-Kosovë 0-3
Kombëtarja shqiptare e futbollit humbi thellë ndaj Kosovës në miqësoren e zhvilluar në Zyrih, në një ndeshje ku trajneri Panucci pa se si skuadra bëri 90-minutëshin më të keq që kur ai drejton kuqezinjtë. Eksperimentet me formacionin nuk sollën asgjë pozitive. Zeneli zhbllokoi ndeshjen që në minutën e 20-të me një gol të bukur. Shqipëria u mundua të reagonte, por në fillimin e pjesës së dytë do të pësonte sërish dhe sërish protagonist ishte Zeneli. Në fushë një Shqipëri e dorëzuar e cila në minutën e 67-t do të pësonte edhe golin e tretë.
3 qershor, Shqipëri-Ukrainë 1-4
Kombëtarja shqiptare vijoi me humbje të thella, duke u mundur 1-4 ndaj Ukrainës në miqësoren e luajtur në Evian. Porta e Berishës qëndroi e paprekur vetëm për gjysmë ore lojë. Konolpyanka kaloi në avantazh ukrainasit. Pak minuta më vonë një tjetër gabim i mbrojtjes i lejoi Iarmonenko të realizonte sërish për Ukrainën. Në sekondat e fundit ishte sërish kapiteni Iarmonenko i cili shënoi për Ukrainën që kishte në fushë disa lojtarë të rinj. Goli i vetëm i Shqipërisë u shënua nga Ndoj në të 88’. Ukraina nuk ishte dorëzuar dhe Konolpyanka shënoi golin e katërt, duke mbyllur sfidën.
7 shtator, Shqipëri-Izrael 1-0
Një gol i bukur nga Taulant Xhaka i dha fitoren Shqipërisë
në ndeshjen e parë të Ligës së Kombeve, kundër Izraelit. Djemtë e Panuccit
ishin në formë të mirë, sidomos portieri Strakosha që disa herë shpëtoi gola të
sigurt. Do të vinte minuta e 55-të kur kombëtarja kuq e zi do kalonte në
avantazh. Një e djathtë e fortë e Xhakës në cep të portës, ishte e pakapshme
për portierin mik. Edhe pas shënimit të golit, kuqezinjtë tanë tentuan që të
gjenin edhe golin e dytë, por nuk arritën që të realizonin, duke mbajtur të
hapur sfidën deri në fund.
10 shtator, Skoci-Shqipëri 2-0
Kombëtarja e drejtuar nga italiani Panucci ka dalë e mundur nga transferta skoceze me rezultatin 2-0, duke arritur të rezistojë vetëm një pjesë në “Hampden Park”. Në fillimin e pjesës së dytë Steven Naismith shënoi dy herë në portën e Strakoshës, duke bërë që Skocia të marrë një fitore të pastër në ndeshjen e parë në Ligën e Kombeve, duke qenë se 3 ditë më parë ishte pushim në grupin tonë. Pas fitores me Izraelin, e cila ishte ndeshja e parë në Ligën e Kombeve për Kombëtaren shqiptare, tashmë kuqezinjtë duket sikur zbritën me këmbë në tokë.
10 tetor, Shqipëri-Jordani 0-0
Dëshira e Rei Manaj dhe Bekim Balaj nuk i ka mjaftuar kombëtares shqiptare për të mposhtur Jordaninë, me kuqezinjtë që nuk kanë shkuar më shumë se një barazim 0-0. Në miqësoren e luksit të zhvilluar në “Elbasan Arena”, të besuarit e Christian Panuccit tentuan të tundin rrjetin me të gjitha mënyrat, por fati dhe pritjet e portierit mik lanë të pandryshuara rezultatin e takimit deri në fundin e saj.
14 tetor, Izrael-Shqipëri 2-0
Shqipëria e mbylli me humbje, sfidën e tretë në Ligën e Kombeve, në transfertë ndaj Izraelit. Kuqezinjtë u mposhtën me shifrat 2-0, me nga një gol të pësuar në secilën pjesë. Hemed shfrytëzoi një përgjumje të mbrojtjes sonë që në minutën e 8-të. Më pas, kontrollin e lojës e bën Shqipëria, teksa provon edhe shumë herë me Balajn, por pa gjetur rrugën e rrjetës. Në të 83-tën, Seba shënoi edhe të dytin, pas një goditje nga jashtë zone, që pati edhe devijimin e Gjimshitit.
17 nëntor, Shqipëri-Skoci 0-4
Kombëtarja shqiptare e mbyll me turp pjesëmarrjen e parë në
Ligën e Kombeve. Kuqezinjtë e drejtuar nga Christian Panucci janë shkatërruar
0-4 nga Skocia në sfidën e luajtur në stadiumin “Loro Borici”. Vuajtjet nisën
në minutën e 14-të, ku Fraiser kaloi në avantazh të tijtë pas një gabimi të
Xhakës. Për t’ia u bërë më të lehtë fitoren kundërshtarëve, mendoi kapiteni
Mërgim Mavraj që në minutën e 22-të ndëshkohet me karton të kuq, pas goditjes
me kokë të kundërshtarit. Fletcher do të dyfishonte rezultatin në fundin e
pjesës së parë nga pika e bardhë e penalltisë. Në pjesën e dytë ishte radha e
Forrest që me dopietën e tij vulosi rezultatin 0-4.
20 nëntor, Shqipëri-Uells 1-0
Shqipëria ka arritur të fitojë 1-0 miqësoren ndaj Uellsit, falë një penalltie të shndërruar në gol nga Bekim Balaj në pjesën e dytë. 11-metërshi i ekzekutuar nga sulmuesi shkodran u fitua në minutën e 58-të nga Xhaka. Në pjesën e parë ishte portieri Berisha ai që shpëtoi Shqipërinë në dy raste, ndërkohë që pas golit të kombëtares sonë, uellsianët patën pretendim për penallti në dy raste.