Skuadra e Atalantës ka konfirmuar se pak nga pak po i kthehet rezultateve me të cilat kishte mësuar në edicionin e kaluar dhe se është pretendente për vendet më të larta në klasifikim. Këtë e tregon më së miri rezultati i sotëm, fitorja 2-0 në fushën e Romës, një kundërshtar i vështirë dhe me pretendime, duke kaluar pikërisht verdhekuqtë në klasifikimin e Serisë A.
Dy skuadrat dhuruan një ndeshje të hapur, duke kërkuar golin, por duke mos prodhuar shumë gjuajtje drejt portës. Ndaj për të parë golin e parë u desh të pritej minuta e 71-të e ndeshjes, kur Zapata, i cili kishte hyrë në fushë vetëm 10 minuta më parë, dërgoi sferën në rrjetën e vendasve. Përpjekjet e verdhekuqve për të barazuar ndeshën në mbrojtjen e vëmendshme të Atalantës, e cila më pas shënoi edhe golin që mbylli ndeshjen me De Ron në shtesën e takimit.
Një rezultat i rëndësishëm për Atalantën, por edhe një lajm i keq për Berat Gjimshitin. Lojtari ishte lënë në stol nga trajneri Gasperini, duke i bërë vend Kjaer në qendër të prapavijës. Meqë ekipi sot u shfaq shumë solid në prapavijë, pritet që mbrojtësi shqiptar të mbetet në pankinë edhe në sfidat në vijim të skuadrës së tij.