Verder Bremen ka shkaktuar një nga surprizat e mëdha të Kupës së Gjermanisë, duke eliminuar kryesuesen e Bundesligës, Borusia Dortmund, në fushën e kësaj të fundit, falë edhe aftësive të Milot Rashicës.
Talenti i përfaqësueses së Kosovës ishte titullar në këtë duel dhe nuk zhgënjeu, duke gjetur rrugën e rrjetës që në minutën e 5 të sfidës për t’i dhënë avantazhin skuadrës së tij. Por një goditje dënimi perfekte e Rojs në shtesën e pjesës së parë barazoi shifrat të cilat nuk ndryshuan më deri në përfundimin e 90 minutave.
Në shtesë, skuadrat gjetën secila nga dy herë golin, pasi Pulisiç dhe Hakimi shënuan për Borusian, ndërsa Pizarro e Harnik realizuan për Verder Bremenin, duke bërë që sfida të mbyllej 3-3 dhe fituesi të caktohej nga penalltitë. Aty u treguan më të saktë futbollistët e Verder, që realizuan 4 provat e tyre ndërsa Alkaser dhe Filip gabuan tentativat për Borusian, duke i dhënë lamtumirën turneut.
Në ndeshjet e tjera të luajtura sot bie në sy edhe eliminimi i Bajer Leverkusen nga Haidenhaim.