Pas incidentit të ndodhur në ndeshjen e Kategorisë së Dytë mes Delvinës dhe Albpetrolit ku mbeti i dëmtuar gjyqtari Elis Pulaj, Komisioni i Disiplinës pranë FSHF-së ka dënuar skuadrën sarandiote.
Delivna ka humbur ndeshjen në tavolinë me rezultatin 3-0 për mos përmbushjen e kushteve të sigurisë gjatë takimit.
“KF Delvina, për dështim në përmbushjen e përgjegjësive dhe mosgarantim të sigurisë së zyrtarëve të ndeshjes, në bazë të neneve 24, 30, 50, 63/1/c dhe 64/3/b të KDS, humbet ndeshjen në tavolinë me rezultatin 3-0 kundër SHS Albpetrol, zhvillimin e ndeshjeve të mbetura të sezonit 2020-2021 të Kampionatit të Kategorisë së Dytë Grupi B, në fushë asnjanëse” – thuhet në njoftimin e komisionit.
Incidenti ndodhi 3 ditë më parë i ku një person i identifikuar me inicialet A.H., i shpallur në kërkim, u fut në fushë dhe goditi me gurë gjyqtarin anësor të takimit Delvina-Albpetrol, Elis Pulajn.
Ndër të tjera edhe mbrojtësi i Tiranës Marsel Ismailgeci është pezulluar për 2 ndeshje për sjellje antisportive ndaj kundështarëve gjatë përballjes me Skënderbeun.
“Lojtari i KF Tirana, Marsel Ismailgeci, për sjellje josportive ndaj kundërshtarit, në bazë të Nenit 47/1/d të KDS dënohet me 2 (dy) ndeshje pezullim nga aktiviteti futbollistik” – thuhet në njoftimin e Komisionit.