Komiteti Olimpik Kombëtar Shqiptar vazhdon të prodhojë bëma nga më të ndryshmet, duke konfirmuar se është një nga organet sportive më problematike në vend. Pak ditë para Asamblesë Zgjedhore më date 17 prill, KOKSH ka përjashtuar nga e drejta e votës 22 federata anëtare, me pretendime nga më të ndryshmet.
Komisioni i Verifikimit dhe Etikës në KOKSH ka bërë të qartë se ata kanë bërë shkelje nga më të ndryshmet duke filluar nga mosplotësimi i dokumentacioneve të ndryshme apo si në rastin e FSHF-së, edhe për mungesën e pagesës së kuotave të anëtarësimit vjetor në KOKSH.
Një situatë e pazakonte që bën që në zgjedhje të shkojnë vetëm 18 federata, ndërsa do të mungojnë përfaqësuesit e disa prej sporteve elitare në vend si futbollit, atletika, peshëngritja apo gjimnastika, të cilat në vitet e fundit kanë dhuruar medalje apo arritje të rëndësishme ndërkombëtare. Nga ana tjetër, do të zgjedhin presidentin e ri dhe pjesëtarët e Komitetit Ekzekutiv federata si ajo e Zhytjes, Vrojtuesit e Plazhit dhe Shpëtimit në Ujë apo Teqball.
Gjithashtu i njëjti komision ka përjashtuar nga gara për president apo për anëtar të Komitetit Ekzekutiv shumë emra të njohur si Artan Shyti, Elez Gjoza, Gjergj Ruli, Skënder Anxhaku apo Viktor Gjoni.