Samuel Nikaj, mjaft i irrituar pas ndeshjes me Korabin ka akuzuar gjykimin, por edhe ata që organizojnë garën, që sipas tij nuk e duan ekipin matjan në elitë dhe nuk po e lënë që të ecë përpara. Trajneri i Burrelit, menjëherë pas takimit me dibranët ka menduar edhe largimin për shkak të situatës së krijuar.
“Futbolli ka degraduar, ta shpif ky kampionat në këtë mënyrë si po bëhet. Që kur u caktua ky gjyqtar u demotivuam. Ndoshta Burrelin nuk e do FSHF, ndoshta edhe ekipeve të Superligës u duket larg. Arbitri na masakroi edhe pse djemtë kanë dhënë shumë në fushë për këtë kampionat.
E pësoi Lushnja vjet, por duket se po e pësojmë ne këtë vit. Kemi qenë ekipi që kemi dominuar. Gjyqtari e menaxhoi ndeshjen si donte, na kanë mohuar 2-3 penallti. Në futboll edhe ndëshkohesh, por duket se ndeshjet po vendosen nga lart.
Në tri ndeshje direkte jemi goditur nga gjyqtarët. Me Dinamon edhe në dy ndeshjet me Korabin. Arbitrat s’e duan Burrelin, janë ata që nuk na duan edhe pse po investohet shumë.
Do flas me kryebashkiakun, unë jam dorëzuar për vete dhe më vjen keq.
Personalisht e shoh të pashpresë situatën, do të flas me kryebashkiakun, sepse ai ka investuar shumë. Ka skenarë, unë kam një jetë në sport, është një deklaratë e mirë menduar dhe jam shumë i qetë”, – tha Samuel Nikaj pas ndeshjes me Korabin.