Gjyqtari Përparim Kalo është caktuar nga Kushtetuesja si relator për çështjen e shkarkimit të presidentit të republikës Ilir Meta. Kalo u zgjodh në Gjykatën Kushtetuese nga vetë kreu i shtetit në dhjetorin e vitit të kaluar.
Sipas ligjit çështja e shkarkimit të Presidentit shqyrtohet paraprakisht nga Kolegji, i përbërë nga tre gjyqtarë të Gjykatës Kushtetuese, ku bën pjesë dhe relatori. Kolegji ka 3 muaj afat nga data e dorëzimit të kërkesës për të vendosur nëse çështja kalon për shqyrtim në seancë plenare. Duke pasur parasysh se Kuvendi e ka dorëzuar kërkesën në 14 qershor, atëherë ky afat përfundon në 14 shtator. Por nëse mbajmë parasysh se muaji gusht është pushim, atëherë afati është 14 tetori.
E deri në këtë datë, jo pak gjëra pritet të ndryshojnë. Së pari mendohet që në fillim të vjeshtës Gjykata Kushtetutese të ketë 9 anëtarë nga 7 që ka aktualisht, pasi pritshmëritë janë që Gjykata e Lartë të ketë kuorumin e nevojshëm për të zgjedhur 3 anëtarët e saj në Kushtetuese.
E nëse gjykata plotësohet, atëherë trupa që do të vendosë për fatin e Ilir Metës do të ketë 3 gjyqtarë e zgjedhur nga Presidenti, 3 nga Parlamenti e 3 nga Gjykata e Larte.
Kjo është hera e parë që Gjykata Kushtetuese do të shprehet për një çështje kaq të rëndësishme si shkarkimi ose jo i Presidentit të Republikës.