Dita e sotme shënon dhe 79 vjetorin e Konferencës së Pezës, një ngjarje në historinë e Shqipërisë që synoi unifikimin e fatorëve të ndryshëm politik në vend për t’u bashkuar kundër pushtuesve nazi-fashistë gjatë Luftës së Dytë Botërore.
Kryetari i Bashkisë së Tiranës, Erion Veliaj së bashku me përfaqësues të qeverisë dhe të shoqatave të veteranëve morën pjesë në ceremoninë e zhvilluar në Pezë ditën e sotme.
Në fjalën e tij kryebashkiaku Veliaj në analogji me simbolikën e bashkmit që pasqyron Konferenca e Pezës, u shpreh se qeveria e mandatit të tretë të kryeministrit Rama do të jetë një besëlidhje e re në shërbim të qytetarëve.
“Është dita kur po formohet qeveria e re, e të majtëve, e të djathtëve. Qeveria jonë, si një besëlidhje e re, qeveria e tretë e Edi Ramës si një besëlidhje e re për t’i shërbyer të gjithëve pa dallim feje, krahine, pa dallim ideje ashtu siç e kërkon Konferenca e Pezës.
Jam ndjerë shumë krenar me ngjarjet e fundit ku qeveria jonë hapi dyert e Shqipërisë për të mirëpritur popullin afgan. Dhe në kulmin e luftës këtu në Pezë ne kemi mirëpritur hebrenjtë, ishin 200 përpara lufte, ishin 2000 pas lufte. Jo vetëm u kujdesëm për lirinë tonë, por u kujdesëm edhe për lirinë e të tjerëve”, tha Veliaj.
Teksa vendosi kurora me lule në monumentin dhe varrezat e dëshmorëve në Pezë, Veliaj rikujtoi që vitin tjetër Tirana do mirëpresë të rinj nga e gjithë bota në kuadër të “Tirana, Kryeqyteti Europian i Rinisë 2022”.
“Më vjen mirë gjithashtu që Ursula Von der Leyen, presidentja e Këshillit Evropian deklaroi që gjithë viti tjetër do të jetë viti Evropian i rinisë. Nuk mund të kemi një rini të shëndoshë nëse nuk kthehemi pas për të kuptuar ku i kemi rrënjët”, përfundoi Veliaj.