Vetëm 2.5 miliardë lekë, nga 3 miliardë lekë të planifikuara në buxhet parashikohet të shpërndahen deri në fund të vitit për kompensimin e ish-pronarëve.
Ministrja e Financave dhe Ekonomisë, Delina Ibrahimaj deklaroi sot gjatë diskutimit nen për nen të projektbuxhetit në Komisionin Parlamentar të Ekonomisë dhe Financave se shpërndarja e këtij fondi ka vështirësi në përthithje.
Ministrja tha se për këtë arsye edhe fondi i parashikuar në projektbuxhetin e vitit 2022 do të pakësohet me 500 milionë lekë, duke shkuar në 4.5 miliardë lekë nga 5 miliardë lekë që planifikohej.
“Arsyeja pse vendosëm të prekim këtë fond, me gjithë vullnetin tonë për t’i kompensuar e kryer pagesat ka vështirësi në përthithje. Do të jetë e vështirë që fondi prej 5 miliardë lekësh të disbursohet i tëri”, deklaroi ministrja.
Ndërkohë opozita kërkoi që fondi për kompensimin e ish-pronarëve të shtohet e jo të pakësohet.
Propozimi i Ministrisë së Financave dhe Ekonomisë shqyrtohet sot në Komisionin e Ekonomisë dhe Financave që është edhe komisioni përgjegjës, për t’u votuar të enjten në seancën plenare për miratimin nen për nen të projektbuxhetit për vitin 2022.