Plot katër fitore në katër sfidat e fundit përforcojnë statusin e Tiranës si favorite absolute. Bardheblutë qëndrojnë të qetë në krye, plus 6 pikë në raport me Laçin, ndjekësin e tyre më të afërt. Ekipi i Orges Shehit nuk gabon thuajse në asgjë, nuk po gabon më as përballë atyre që konsiderohen ekipet të vogla.
Pas bënë saktë detyruat e shtëpisë, duke marrë 6 pikë të plota kundër Skënderbeut dhe Egnatias, tani kërkohet të bëjnë të njëjtën gjë edhe përballë Kastriotit, rivali i fundit i lehtë, nëse mund të quhet i tillë, përpara se të nisin një tur të vërtetë force përballë rivalëve direkt, duke nisur nga përballja e titullit me Laçin në javën e 22-të.
Trajneri Shehi mund të buzëqesh pasi për sfidën ndaj Kastriotit rikthehet “bomberi” i ekipit, Taulant Seferi. Sulmuesi u pastrua nga kartonët për të qenë gati kur gjërat të bëhet të rëndësishme. Një rikthim me shumë peshë është edhe ai i kapitenit Erjon Hoxhallari. Mbrojtësi është rikuperuar totalisht dhe do të jetë në dispozicion të ekipit duke nisur nga sfida me Kastriotin.
Për këtë përballje Shehi duhet të bëjë llogaritë pa Vesel Limaj, një tjetër titullar i rëndësishëm që ka plotësuar numrin e kartonëve.