I denoncuar i zhdukur nga familja, biznesmeni shqiptar në Itali, Fatmir Ara u gjet i vrarë me armë zjarri disa ditë më parë në Torino. Dyshohet se 43-vjeçari është torturuar duke u rrahur dhe therur me thikë, i lidhur pas një peme përpara se të ekzekutohej me armë zjarri.
Viktima mund të jetë futur në grackë, pak minuta pasi kishte dalë nga shtëpia. Ara ishte nisur për në punë mëngjesin e së premtes, në orën 07:30 dhe më pas u zhduk, pa bërë qoftë dhe një telefonatë me bashkëshorten, me të cilën kishte 2 fëmijë.
Armët e përdorura për të ekzekutuar Arën nuk janë gjetur, por ekspertët kanë gjetur makinën e braktisur pak metra nga vendi ku u gjet trupi i pajetë. Makina mësohet se është në pronësi të një tjetër shqiptari, i cili nuk besohet të ketë lidhje me ngjarjen.