Fatos Lubonja, duke komentuar vjedhjen e 120 mijë eurove në banesën e ish-zyrtares së lartë të shtetit, Alda Klosi, e krahasoi këtë ngjarje me historinë e “Mbreti Lakuriq”, ku të gjithë e dinë se sa të përfshirë janë punonjësit e administratës në korrupsion.
Në një intervistë për News24, analisti u shpreh se pastruesja Rozeta Dobi nuk do të tregojë më shumë për paratë e vjedhura apo tek kush i ka vjedhur, kjo për të mos nxjerrë zbuluar edhe zyrtarë të tjerë.
“Ajsbergu tek ne ka dalë i gjithi, të gjithë e shohin, është si historia e mbretit lakuriq. Tani s’ka njeri që se ka marrë vesh që ajsbergu duket sheshit, por edhe e themi, por mbreti nuk çan kokë fare, sepse ka kapur gjyqtarë dhe të gjitha dhe jemi në një situatë ku ky është rendi i gjërave në Shqipëri, të vjedhësh, të ndërtosh me para të vjedhura, të bësh politikë e të ngrihesh në karrierë, është normale është rendi i gjërave në Shqipëri. Llogarite sa fuqi ka zonja Klosi dhe krahasoje me të tjerët sa kanë marrë të tjerët. Të gjithë i dimë edhe me emra. Poshtërohemi akoma edhe më shumë se dalin provat dhe shohim që askush nuk vepron. Pse vlen atëherë t’i dimë e ti themi? Rozeta s’do tregojë emrat e atyre që i ka marrë paratë jo se nuk do ajo, por sepse nuk e lënë. Është e qartë nga kanë dalë ato para, është një skemë dhe secili merr atë që i takon. Ajo i ka vjedhur tek kolegë të zonjës Klosi, mendoni ju që se dinë se ku ka punuar ajo? Mendoj se mbulojnë dikë.”