Policia e Vlorës ka arrestuar një 29-vjeçar pasi qarkullonte me armë në qytet. Sipas policisë, E.H., është me precedent penal në këtë fushë, pasi është arrestuar dhe njëherë më parë për këtë.
Efektivët janë sinjalizuar se ai qarkullonte me armë në zonën e Ujit të Ftohtë dhe kanë konstatuar personin e dyshuar në një lokal. Sapo ka parë forcat e policisë ai ka tentuar të largohet. Por efektivët iu vunë në ndjekje duke e arrestuar në flagrancë.
“Shtetasi E.H., gjatë tentativës për ti shpëtuar Policisë, ka hedhur në tokë armën e zjarrin tip pistoletë CZ-P09, me 16 fishekë. 29 vjeçari ka qenë edhe më parë i arrestuar nga Policia për armëmbajtje pa leje në vitin 2012. Materialet iu referuan Prokurorisë për veprat penale “Prodhimi dhe mbajtja pa leje e armëve luftarake dhe e municionit” dhe “Mosbindja ndar urdhërit të punonjësit të policisë së rendit publik”, thuhet në njoftimin e policisë së Vlorës.
Por në fakt në njoftimet e ndryshme të policisë armët pa leje që u kapën personave janë kryesisht të markave TT apo Zastava, Glock. Arma që iu kap 29-vjeçarit, sipas një kërkimi të thjeshtë në internet rezulton të jetë një armë çeke. Modeli i CZ P-09 u krijua në bazë të bashkëpunimit afatgjatë me shumë operativë nga forcat e armatosura në mbarë botën.
Në fund të testimeve për këtë armë thuhet se ajo ka kaluar testet në mjedise të ashpra, dhe këto teste tejkalojnë standardet e përbashkëta ushtarake dhe të shërbimit.