Sonte në mesnatë përfundon afati për dorëzimin në KQZ, kjo të emrave të kandidatëve për kryebashkiakë dhe listave të kandidatëve për Këshillat Bashkiakë për subjektet politike që do të marrin pjesë në zgjedhjet e 14 majit.
Partia Demokratike me kryetar të komanduar Enkelejd Alibeaj konfirmoi dje 16 kandidatë për kryetarë bashkie, teksa vendosi të mos garojë në tre bashki të mëdha si Durrësi, Elbasani dhe Shkodra, duke mos nxjerrë rivalë brenda kampit opozitar për Igli Carën, Luçiano Boçin dhe Bardh Spahinë.
Kryesia e PD-së ka vendosur që Roland Bejko, njëri prej anëtarëve brenda radhëve të saj, të jetë emri si kandidat për kryetar Bashkie në Tiranë. Bejko përveç anëtar Kryesie mban në PD edhe postin e Sekretarit për Çështjet Vendore në këtë forcë politike. Bejko është gjithashtu drejtues politik i PD-së në Qarkun Gjirokastër, ka kandiduar disa herë për deputet, ndërkohë që ka drejtuar për disa vite degën e demokratëve në qytetin e Gjirokastrës. PD e Alibeajt e ka vendosur si kandidat për kryebashkiak në Tiranë.
Jorida Tabaku është shprehur se duhen mbështetur kandidatët e dalë nga primaret. Tabaku nuk ka pranuar që të dalin me kandidat për kryebashkiak, por të dilet vetëm me kandidatë për këshilltarë.
“Unë jam kundër kandidateve për kryetare bashkie të tjerë nga opozita. Për më tepër në Tiranë, Durrës dhe Elbasan! Përçarja e partisë në bazë është shumë e dukshme, sidomos në Tirane dhe çdo vendim i tillë thjesht do ta përkeqësonte situatën! Ne duhet të mendojme për emrin e Partisë Demokratike dhe për logon e PD-së dhe duhet ta mbrojmë atë të ngrihet e jo të rrudhet! Jeni duke vepruar gabim dhe po e zvogëloni Partinë Demokratike! Na lejoni të fokusojmë energjitë në listat e këshillit bashkiak dhe te emri i subjektit Partia Demokratike”, tha Tabaku.
- Mallakastër- Agron Kapllanaj
- Poliçan – Florian Qamo
- Kuçovë – Ilirjan Koxhaj
- Kamëz – Bilbil Bajraktari
- Lezhë – Sandër Marku
- Krujë – Sabah Sheta
- Dibër – Naim Gazidede
- Dimal- Dritan Sula
- Patos- Pranvera Rizai
- Fier -Eriselda Zotaj Çelaj
- Librazhd -Bujar Vreto
- Vorë- Ibrahim Bruka
- Korçë -Gjergji Gjata
- Sarandë- Skënder Muço
- Mirditë- Mark Ruçi
- Tiranë Roland Bejko