Ministrja e Shtetit për Marrëdhënien me Parlamentin, Elisa Spiropali në seancën plenare në Parlament i ka kthyer përgjigje Alibeajt dhe Bashës për akuzat që ngritën mbi reformën zgjedhore. Po ashtu komentoi edhe reagimin e deputetes Albana Vokshi për incidentin e Ramës me gazetaren Ambrozia Meta.
”Nuk i kam dëgjuar të kenë ngritur një shqetësim të vetëm për sistemin zgjedhor. Nuk mund të vish pas 10 vitesh dhe të kujtosh që duhet përmbysur sistemi. Ne e ngritëm atë komision për të gjetur dakordësinë dhe për të gjetur opsione që janë afër. Nuk jemi aty të presim ultimatume qesharake që na detyrojnë një opsion apo një tjetër. Është komisioni më jetëgjatë dhe më pa produkt për arsyet tuaja.
Sa i takon listat e hapura, vota e diasporës kemi kohë ti diskutojmë. Kemi qenë ne, i përfshim në programin tonë elektoral. Kemi qenë ne që ja kemi ofruar publikut dhe opsionet si mund të ndodh. Kemi mundësuar edhe një grup në komision të ligjeve. Ai është një vend i mirë ku mund ta bëjmë debatin. Sa i takon dhunës. Deputetët kanë dhunuar kolegët e tyre në komisione dhe nuk janë të përshtatshëm për të folur për dhunën. Nuk është e pranueshme në asnjë rast. Ajo dhunë në komisione uroj të mos përsëritet. Më vjen keq për deputeten që foli, është shembulli më ekstrem i dhunës”.