Këshilli i Mandateve të Kuvendit është mbledhur këtë të mërkurë për të zëvendësuar deputetët që hoqën dorë nga mandati për të kandiduar për kryetarë bashkish.
Ashtu siç pritej dhe nga listat e PS të 2017-tës, Rakip Sulin e zëvendëson Eljo Hysko. Ky i fundit aktualisht është kryetari i Forumit Rinor të Partisë Socialiste.
Ndërkaq, zv. Ministrja e Shëndetësisë dhe Mbrojtjes Sociale, Ardiana Jaku merr mandatin e deputetit të Lezhës, Pjerin Ndreu.
Ndërsa Nuri Belbën në Elbasan e zëvendëson Florenc Spaho, sipas listës shumëemërore. Mandatin e Ilir Xhakolli në Korçë e merr Ardit Konomi, aktualisht drejtor i Spitalit të Korçës.
Lexo edhe- Kush zëvendëson në Kuvend deputetët që garojnë për kryetarë bashkish
Në këtë mënyrë Kuvendi do të ketë katër deputetë të rinj socialistë. Rakip Suli garon për bashkinë e Kamzës, Pjerin Ndreu të Lezhës, Ilir Xhakolli të Pogradecit dhe Nuri Belba për bashkinë e Prrenjasit.