Prej më shumë se një muaji, 8-vjeçarja Elodi Rapi ndodhet e shtruar në Spitalin Pediatrik të Tiranës, pasi është diagnostikuar me një sëmundje autoimmune inflamatore dhe hepatit autoimmun, që i kanë shkaktuar një insuficiencë të rëndë hepatike.
Gjendja shëndetësore e vogëlushes është kritike dhe, sipas mjekëve, kërkon trajtim të specializuar jashtë vendit. Familja ka gjetur mundësi për trajtimin e saj në një spital jashtë Shqipërisë, por kostot janë shumë të larta për t’u përballuar vetë.
Apeli për ndihmë vjen nga tezja e Elodit, e cila shprehet se: “Elodi nuk është vetëm mbesa ime, ajo është shoqja ime më e ngushtë dhe dashuria më e madhe e familjes sonë. Bëj këtë thirrje me shpresën se do të mund ta ndihmojmë të fitojë këtë sfidë jetësore.”
Fushata e ndihmës synon të mbështesë financiarisht familjen për përballimin e shpenzimeve spitalore, ekzaminimeve të specializuara, ndërhyrjeve dhe çdo procedure tjetër të nevojshme për shërimin e Elodit.
Të gjitha fondet do të administrohen në transparencë të plotë dhe do të kalojnë në llogarinë bankare të një familjareje të besuar në Itali. Familja e Elodit i bën thirrje të gjithë njerëzve me zemër të madhe që të kontribuojnë, sado pak, për t’i dhënë shpresë një vogëlusheje që lufton për jetën.