Barcelona ka zyrtarizuar transferimin e Karim Adeyemit, i cili largohet nga Borussia Dortmund për t’iu bashkuar skuadrës së drejtuar nga Hansi Flick.
Sulmuesi 24-vjeçar ka firmosur një kontratë deri në vitin 2031, ndërsa klubi katalanas do t’i paguajë Borussia Dortmundit 22 milionë euro si shumë fikse. Marrëveshja përfshin edhe deri në 7 milionë euro bonuse të lidhura me paraqitjet dhe objektivat sportive, ndërsa klubi gjerman ka ruajtur edhe një përqindje nga një transferim i mundshëm në të ardhmen.
Adeyemi rikthehet kështu nën drejtimin e Hansi Flick, trajnerit që i dha debutimin me kombëtaren gjermane në vitin 2021. Tekniku e vlerëson 24-vjeçarin për shpejtësinë, aftësinë në duelet një kundër një dhe fleksibilitetin në repartin ofensiv.
I formuar në akademinë e Red Bull Salzburgut, Adeyemi iu bashkua Borussia Dortmundit në vitin 2022, ku zhvilloi 146 ndeshje dhe realizoi 36 gola. Megjithatë, periudha e tij në Gjermani u ndikua edhe nga dëmtimet, ndërsa tashmë synon të rikthehet në formën më të mirë me fanellën blaugrana.
Me këtë afrim, Barcelona shton një tjetër alternativë në sulm, duke forcuar krahët e ofensivës me një futbollist të njohur për shpejtësinë dhe depërtimet në hapësira.