Në situatën e tensionuar politike të krijuar për Gjykatën Kushtetuese kreu i shtetit Ilir Meta paralajmëroi maxhorancën se Parlamentin e shpërndan me vetëm një dekret. Por këshilltari ligjor i tij, Bledar Dervishaj i ftuar në News 24 tha se këtë e përcakton Kushtetuta, por tha se institucioni i Presidencës ka vendime të tjera për të marrë, referuar dhe kallëzimit penal për kreun e KED-së, Ardjan Dvorani.
“Parlamenti shpërndahet me një dekret? Shpërndahet. Ne kemi vendime të tjera për të marrë, nuk kemi vajtur në atë fazë që të vlerësojmë shpërndarjen e Kuvendit. Po realiteti është që Parlamenti shpërndahet me një dekret. E thotë Kushtetuta, nuk e them unë”, tha Dervishaj.
Ai tha se padia për kreun e KED-së, Ardian Dvorani është formalizuar dhe është një material voluminoz, por për shkak të angazhimeve të Metës, ajo mund të dorëzohet nesër.
Lidhur me një video të paralajmëruar më parë nga institucioni i Presidentit, Dervishaj nuk pranoi ta komentonte por tha se do të publikohet brenda fundit të kësaj jave. Ai këmbënguli se konflikti nuk është nisur nga Presidenti dhe se Kuvendi nuk tregoi bashkëpunim.
