14 punonjës policie, ish-efektivë, punonjës të administratës dalin sot para Gjykatës së Shkallës së Parë në Shkodër. Saimir Rrustemi, ish-Shef i Rendit në qytetin verior i cili së fundmi ishte transferuar në sallën operative të Policisë në Dibër, u arrestua së bashku me disa punonjës të policisë e ish-zyrtarë.
Ata u arrestuan pasi akuzohen se kanë favorizuar subjekte të ndryshme në periudha të caktuara për të përfituar fiktivisht tendera me vlera të vogla në Drejtorinë e Policisë së Shkodrës.
Si rrallë herë, qytetarët kanë dalë në protestë për të mbrojtur Saimir Rrustemin. “Shef Saimiri krenaria e policisë”, “burgu nuk është për të ndershmit”, janë mesazhet e protestuesve në mbrojtje të efektivit Saimir Rrustemi. “Unë njoh punën e tij. Më ka bërë përshtypje korrektesa që e vlerësoj si model të rrallë në Shqipëri. Shumë korrekt. Arrestimi është veprim ekstrem. Kur dimë shumë mirë se çfarë akrobacish janë bërë në Shqipërinë tonë”, thotë një qytetare që ka dalë për të protestuar.